Ялсенчи шкулсенче çуркуннехи каникул пырать. Кунерти вăтам шкулта вĕренекенсен те – хаваслă кану вăхăчĕ. Каникулăн пĕрремĕш кунĕнчех кунта ачасем валли лагерь ĕçлеме пуçларĕ. Унăн сменине савăнăçлă лару-тăрура уçрĕç. Вăл пурне те хавхаланупа ырă кăмăл парнелерĕ.

Шкулти лагере хаваслă лару-тăрура уçнă хыççăн вĕренекенсене хăрушсăрлăх правилисене аса илтерчĕç. Вĕсене пĕлни кашнине хăйне çирĕппĕн те шанчăклăн тытма май парать. Ачасене çул çинчи хăрушсăрлăх правилисене те аса илтерчĕç. Тимлĕ пулни шкул территорийĕнче те кирлĕ вĕт. Интернетра та хăрушсăрлăх çинчен асра тытмалла – унпа усă куракан ачасен онлайн-уçлăхра хăйсене хÿтĕлеме пĕлмелле.

Унтан активлă кану вăхăчĕ çитрĕ. Ачасем савăнсах хаваслă спорт мероприятине – «Сывлăх марафонне» хутшăнчĕç. Вĕсем хăйсен çаврăнăçулăхне, вăйне, командăра туслă пулнине тĕрлĕрен эстафетăсемпе конкурссенче кăтартса пачĕç. Кашни ăмăртура – хаваслă кулă, савăнăçлă сасăсем...

Пирĕн воспитанниксен пултарулăхне тĕрĕслеме вара çуркуннене халалланă ÿкерчĕксен конкурсне йĕркелерĕç. Çамрăк художниксем хут çине хăйсен çуркуннехи фантазийĕсене хывма тытăнчĕç, илемлĕ ĕçсем тума пултарчĕç. Вĕсен ÿкерчĕкĕсенче – çара йывăç турачĕсем айĕнчен курăнакан хĕвел пайăркисем, çутталла хăюллăн туртăнакан ачаш çеçпĕл чечекĕсем, хаваслăн шăнкăртатакан шыв юххисем... Хăшпĕр ĕçсенче – ăшă енчен таврăнакан кайăксем, теприсенче – çĕр айĕнчен тухакан симĕс курăксем. Кашни ача хăйĕн ĕçне чунне парса тунă, çуркунне епле хитре те савăк пулнине кăтартса пама тăрăшнă. Конкурс чăннипех те пурин кăмăлне çĕклерĕ, шкул ачисем çулталăкăн чи хĕвеллĕ вăхăчĕ çитнĕшĕн чунтан савăннине кăтартса пачĕ.

Кунер шкулĕнчи кану лагерĕн пĕрремĕш кунĕ питĕ хаваслă та тухăçлă, интереслĕ иртрĕ. Малта – нумайлăха асра юлмалли татах та пуян событисемпе савăнăçлă самантсем сахал мар пулчĕç. Вĕсем ачасене туслăха, тимлĕхе вĕрентеççĕ, çуркуннехи кĕтнĕ каникула усăллă ирттерме пулăшаççĕ.

В. ДАВЫДОВА.