Раççей Федерацийĕн Президенчĕн Владимир Путинăн пуçарăвĕпе йĕркеленĕ «Сывлăх сыхлавĕ» наци проекчĕпе килĕшÿллĕн çĕршывра «Земство фельдшерĕ» программа пурнăçа кĕнĕ. Шăпах унпа усă курса пирĕн районти тĕп больницăра нумай пулмасть икĕ специалист ĕçлеме тытăнчĕ.

Вĕсенчен пĕри, Наталья Михайлова, Куславккара çуралса ÿснĕ, 2001 çулта Шупашкарти медицина училищинчен вĕренсе тухнă. Хăй каланă тăрăх, шкулта чухнех медсестра пулма ĕмĕтленнĕ, халĕ вăл Пилешкассинчи фельдшерпа акушер пункчĕн заведующийĕ пулса ĕçлет. Пилешкассинче тата Пакăшра пурăнакансене кунсерен медицина пулăшăвĕпе тивĕçтерет. Ĕç кунĕ вĕçлениччен пурне те ФАПра йышăнать, унтан чирлĕ çынсен сывлăхне вĕсем патне килне кайса тĕрĕслет.

Патăръел округĕнче çуралса ÿснĕ Роза Елехина халĕ Криушри фельдшерпа акушер пунктĕ- нче тăрăшать. Вăл та Шупашкарти медицина училищинче «Сиплев ĕçĕ» специальноçа алла илнĕ. Медицинăна ăнсăртран суйласа илмен çамрăк фельдшер. Иккĕмĕш сыпăкри тăванĕ фельдшер пулса ĕçленине кура хĕрача унăн ĕçĕпе хытах интересленнĕ. Шкултан вĕренсе тухас умĕн вара медицина сферинче тăрăшатăпах тесе хăйĕн умне çирĕп тĕллев лартнă.

Аса илтеретпĕр: «Земство тухтăрĕ» тата «Земство фельдшерĕ» программăсем медицина ĕçченĕсене яллă вырăнсене явăçтарма пулăшаççĕ. Вĕсем регионти инçетри ялсемпе хуласенче пурăнакансене вырăнтах медицина пулăшăвĕпе тивĕçлĕ усă курма май параççĕ.

Е. ПИТОМЦЕВА.