Раççейре иртекен «Кĕнекесене юратса парнелĕр» IX акци кăçал Пĕтĕм тĕнчери кĕнеке парнелемелли кунпа пĕр килчĕ. Ку мероприятие нумай çын хутшăнчĕ, çав шутра Куславкка муниципалитет округĕн пуçлăхĕн пресс-секретарĕ, журналист, писатель, спортсмен Олеся Михайлова та.

Вăл Тĕрлемес библиотекине Элиза ятлă хĕрĕпе пычĕ, хăйĕн 2024 çул вĕçĕнче пичетленсе тухнă «Пĕрремĕш çĕнтерÿ. Первая победа» кĕнекине парнелерĕ. Чăвашла çырнă калавĕ-сенче Олеся Владимировна ачалăхне, çемйине тата юлташĕ-сене сăнласа панă.

Кăларăм Чăваш кĕнеке издательствинче кун çути курнă. Çамрăк писателĕн Олеся Михайлован калавĕсем шкулта вĕренекенсене кăна мар, çитĕ-ннĕ çынсене те интереслентерессе шанатпăр, мĕншĕн тесен вĕсенчи сăнарсем туслашма та, юратма та, пурнăçпа савăнма та, аслисене хисеплеме те пĕлеççĕ.

Л. АЛЕКСАНДРОВА.