Куславкка, Сĕнтĕрвăрри, Вăрмар, Çĕрпÿ, Тăвай тата Канаш округĕсенчи педагогсемпе шкулсенчи театр коллективĕсен ертÿçисем хăйсен квалификацине ÿстермелли программăпа нумай пулмасть «Патриотизм майлă постановкăсен сценарипе режиссура никĕсĕсем» темăпа Канашри Культура керменĕнче вĕреннĕ.

Вĕсен хушшинче Тĕрлемесри вăтам шкулти «Петрушка» театр кружокĕн ертÿçи Л. Казакова тата вырăс чĕлхи учителĕ В. Яковлева та пулнă. Хăйсен пĕлĕвне ÿстерме пухăннă учительсемпе ертÿçĕсем умĕнче Чăваш Республикин тава тивĕçлĕ артисчĕ, Чăваш патшалăх культурăпа искусствăсен институчĕн актерсен ăсталăхĕпе режиссурин кафедрин доценчĕ, республикăри экспериментлă «Дождь» мим-театр» директорĕ Валерий Проворов тухса калаçнă. Вăлах мастер-класа хутшăннисене хăйсен талантне уçса пама, актер ăсталăхĕн чи ансат хусканăвĕсене алла илме пулăшнă. Артист ачасемпе ĕçленĕ чухне усă курмалли меслетсене те кăтартса панă.