Елчĕкри вăтам шкулта 9-мĕш класра вĕренекен Карина Батракова çак кунсенче «СВОна пулăшнăшăн» медаль илме тивĕçлĕ пулчĕ.

Вăл - «Ырă кăмăллă чĕресем» командăн хастар волонтерĕ. Ятарлă çар операцийĕ пуçланнă кунранпах хăй пурăнакан Якуньккă ялĕнчи çынсемпе пĕрле маскировка тетелĕсем çыхать.

Çак медале ăна 589-мĕш мотострелковăй полк командованийĕ ячĕпе ятарлă çар операцине хутшăнакан Евгений Робертович шкулти линейкăра савăнăçлă лару-тăрура пачĕ. Мероприятие Куславкка муниципаллă округăн Карачри территори пайĕн начальникĕ Ираида Ларионова, Илепарти, Якуньккăри, Минкĕшри тата Куславкка хулинчи хастар волонтерсем хутшăнчĕç.

Шкул директорĕ Елена Чердакова Карина ĕçне çакăн пек пысăка хурса хакланăшăн пурне те ăшшăн тав турĕ. Вăл çавăн пекех пирĕн вĕренекенсем, вĕсен ашшĕ-амăшĕсем, учительсем тата кунта ĕçлекенсем ятарлă çар операцинчи ентешсем валли гуманитари пулăшăвĕ пухма яланах хутшăннине, Çĕнтерĕве çывхартма хăйсенчен мĕн килнине пурне те тума тăрăшнине палăртса хăварчĕ.

Н. Николаева.