Волонтерсен Раççейре нумай пулмасть иртнĕ экологипе пархатарлăх проектне «Добрые крышечки» ят панăччĕ. Унта хутшăннисен умĕнче икĕ тĕллев пулчĕ: усă курнă пластик савăтсен хупкăçĕсене пухса тĕнчене тасарах тăвасси тата сусăр ачасене пулăшасси.

Пирĕн республика çак акцине пĕлтĕр хутшăнма пуçланă. Ăна «Тăлăх ачасене – волонтерсен пулăшăвĕ» Ыркăмăллăх фончĕпе пĕрле йĕркеленĕ. Ку проектпа Тĕрлемесри вăтам шкулта 2-мĕш класра вĕренекенсем, «Раççейри орленоксем» программăна хутшăнакансем, хытах интересленчĕç. Арçын ачасемпе хĕрачасем пылак е ахаль шыв, сĕт е турăх тултарнă савăтсен хупкăçĕсене пухрĕç. Унтан вĕсене Куславкка округĕ- нчи клуб системинчи йышăну пунктне ăсатрĕç. Каярах çав хупăсене пластикран тĕрлĕ япала туса хатĕрлекен завода леçеççĕ. Çакăншăн предприяти ыркăмăллăх фондне укçа куçарса парать. Хупăсемшĕн илнĕ укçана тăлăхсене е йывăр чирлĕ ачасене пулăшма яраççĕ. Çавăнпа пиртен кашниех çак пархатарлă ĕçе çулсерен хутшăнасса шанас килет.

И. АНИЛИНА,

Тĕрлемесри вăтам шкулти 2-мĕш класс ертÿçи.