Çемье институтне тата йăлана кĕнĕ хаклă пуянлăха упракансем çинчен эпир хаçатра час-часах вуласа пĕлетпĕр. Вĕсене округра пурăнакансем хисеплеççĕ, обществăлла ĕçсене хастар хутшăннăшăн тав тăваççĕ.

Михаил Артемьевичпа Валентина Васильевна Дмитриевсем пирки те çакнах каламалла. 50 çул пĕр-пĕринпе шăкăл-шăкăл калаçса, килĕштерсе пурăнаççĕ вĕсем. Паян çамрăксем Дмитриевсенчен ырă тĕслĕх илме пултараççĕ, мĕншĕн тесен лешсем кирек кампа та пĕр чĕлхе тупма пĕлеççĕ. Çитĕнекен ăрăва ыррине сахал мар вĕрентеççĕ.

Дмитриевсем Карачри территори пайĕнче чăннипех те хисеплĕ çемье шутланаççĕ. Михаил Артемьевич нумай çул хушши пушар хуралĕнче ĕçленĕ, Валентина Васильевна банк служащийĕ пулнă. Вĕсем виçĕ ача ÿстерсе тĕрĕс воспитани панă, çичĕ мăнукне пурнăç çулĕ çине кăларма пулăшнă. Пĕр-пĕринпе килĕштерсе пурăнни телейлĕ мăшăра кирек хăш йывăрлăха та çĕнтерсе пыма пулăшнă.

Чăваш Республикин юстици енĕпе ĕçлекен патшалăх служби Дмитриевсен çемйине çур ĕмĕр пĕрле пурăннă ятпа ăшшăн тав тунă, çемье йăли-йĕркине аталантарма нумай тăрăшнăшăн Тав çырăвĕ парса чысланă.