Регионсем хушшинчи «Эпĕ - хĕрарăм» конкурса хутшăннă Валентина Якимовна Челышева 101 çул тултарчĕ.

Валентина Якимовна Куславкка муниципаллă округĕн Куснар ялĕнче çуралса ÿснĕ. Вăл нумай çул хушши тăван çĕршыв ырлăхĕшĕн ырми-канми ĕçленĕ. Аслă Отечественнăй вăрçă вăхăтĕнче Куславккари автофургонсен комбинатĕ- нче вăй хунă, ун хыççăн Иваново облаçĕнче вăрман каснă çĕрте тăрăшнă. Каярах тăван районти «Аниш» совхозра хăмла плантацийĕнче ĕçленĕ, унтанах тивĕçлĕ канăва тухнă. Унăн тĕп пуянлăхĕ паян – пысăк çемйи: 6 ачи, 13 мăнукĕпе 23 кĕçĕн мăнукĕ.

«Яланах хастар пулнă, пĕрехмай ĕçленĕ, лара-тăра пĕлмен. Ман шутпа, çавăнпах эпĕ нумай пурăнатăп пулмалла»,- терĕ пĕр ĕмĕр урлă каçнă хĕрарăм. Ялта пурăнакансем каланă тăрăх, Валентина Якимовна Куснар территори пайĕ-нче 100 çултан иртнĕ пĕрремĕш çын пулса тăрать.

«Валентина Якимовна - чăн-чăн паттăр. Вăл пурнăçа аван пĕлни, яланах ырра шанни ялйыша савăнтарать те, тĕлĕнтерет те. Пĕлтĕр ĕç ветеранĕ Чăваш Енри Хĕрарăмсен союзĕ йĕркеленĕ регионсем хушшинчи «Эпĕ - хĕрарăм» конкурса хутшăнчĕ. Хастар хĕрарăм «Кĕмĕл çул ÿсĕмĕ - Раççей мухтавĕ» номинацире Куславкка округĕн чысне хÿтĕлерĕ. Республика кунĕнче Чăваш Енри Хĕрарăмсен союзĕн председателĕ Наталья Николаева çулĕпе пуринчен те аслă хастара асăнмалăх «Çĕршыв хĕрĕсене» медальпе наградăларĕ»,- тесе каларĕ Чăваш Енри Хĕрарăмсен союзĕн Куславккари вырăнти уйрăмĕн ертÿçи, «Единая Россия» партин Чăваш Республикинчи хĕрарăмсен юхăмĕн» Куславкка муниципаллă округĕнчи партпроект координаторĕ Олеся Михайлова.

О. ВЛАДИМИРОВА.