Флюорографи – пĕр-пĕр органа рентген пайăркисемпе экран витĕр кăтартса пленка çине ÿкерсе тĕрĕслени. Ку процедура çынсене ытларах чухне ÿпке чирне вăхăтра тупса палăртма тата сиплеме май парать.

Кашни çын флюорографи тĕрĕслевĕнче çулталăкра пĕрре пулма тивĕçлĕ, мĕншĕн тесен, вăраха тăсăлакан, вилес хăрушлăх кăларса тăратакан чирсем, çав шутра ÿпке ракĕ тата туберкулез çынна ытлашши аптăратмасăрах иртме пултараççĕ. Çавăнпа хăшĕ-пĕри хăйĕн пирки сывах тесе шутлать. Чылай чухне ÿслĕк, сывлăш пÿлĕнни (йывăр сывлани), ÿт температури ÿсни, начарланни, вăй çителĕксĕрри тата ытти хăшпĕр паллăсем шăпах ĕнтĕ çын питĕ йывăр чирленине çирĕплетсе параççĕ. Флюорографире тăтăшах пулни çеç чире ытлашши аталаниччен тупса палăртма май парать.

Пĕлтĕр пирĕн районти тĕп больницăра 10909 çын флюорографи тĕрĕслевĕнче пулнă, çак çул пуçланнăранпа вара – 2000.

«Туберкулез чирне хуть те ăçта та ертме пулать – магазинта, обществăлла транспортра, пĕр сăмахпа, халăх йышлă пулакан вырăнта. Çак ултавлă амакран иммунитет çирĕп тата флюорографире вăхăтра пулни кăна сыхласа хăварма пултарать. Эпир кунсерен 40 яхăн тĕрĕслев ирттеретпĕр. Пирĕн ĕçре хăшпĕр чухне çакăн пек тĕслĕхсем те тĕл пулаççĕ: çын хăйне аванах туять, анчах та флюорографи вара вăл йывăр чирлине çирĕ- плетет», – тет пайăркаллă диагностика уйрăмĕн заведующийĕ – рентгенолог Аркадий Степанович Силов.

Флюорографи тĕпчевĕпе туберкулезсăр пуçне тата ытти нумай чире тупса палăртма пулать: ÿпке шыççине, шыçă пÿрленнине, шыçăнтаракан клеткăсен ушкăнĕнчен çĕнĕлле ÿссе пулакан сиенлĕ шыççа тата ыттине те.

Палăртас пулать, çак процедурăна ирттернĕ чухне пациентăн сывлăхĕ компьютер умĕнче 2-3 сехет хушши ларнă чухне илекен пайăркасенчен ытлашши сиенленмест. Флюорографи тĕрĕслевĕ организмшăн пĕрре те сиенлĕ мар, вăл çыннăн кăмăл-туйăмĕ çинче нимĕнле те палăрмасть. Аса илтеретпĕр: флюорографи тĕпчевĕ диспансеризацин пĕрремĕш тапхăрне кĕрет. «Вăрăм ĕмĕрлĕ тата пуçаруллă пурнăç» наци проекчĕ пулăшнипе районти тĕп больницăра диспансеризацие укçа тÿлемесĕрех ирттерме пулать.

Куславкка районĕнчи тĕп больница пурне те диспансеризацире пулма, короновируспа йывăр чирлесе ирттернисене вара хăйсен сывлăхне тĕплĕнрех тĕрĕслеттермешкĕн килме ыйтать. Кăмăл тăвакансен участокри терапевт патне е медицина профилакторийĕн пÿлĕмне пымалла. Çавăн пекех аса илтеретпĕр: вырăнти (ялсенчи) фельдшерпа акушер пункчĕсенче те, врач амбулаторийĕсенче те диспансеризаци ирттерме пулать.

Р. КОВАЛЕВА.