Октябрьти пĕр илемлĕ те хĕвеллĕ кун хулари 3-мĕш вăтам шкулта 4-мĕш Б тата В классенче вĕренекенсем çăкăр мĕнле çурални çинчен лайăхрах пĕлес тĕллевпе тĕп библиотекăна çул тытрĕç. Унта Пĕтĕм тĕнчери çăкăр кунне халалласа «Çăкăртан асли çук» ятпа интереслĕ мероприяти иртрĕ.

Шкул ачисене пĕрремĕш çăкăр мĕнле пуçланса кайни, ăна кăмакана пĕçерме лартиччен тырă акни, тулли пучахсене комбайнпа вырса илни, йĕтем çинче тасатни, çăнăх авăртса чуста хуни çинчен каласа кăтартрĕç. Интерактивлă станцисем ĕçленĕ вăхăтра ачасем ушкăнсем çине пайланчĕç, сутмалли юмахсен тупсăмĕсене тупрĕç, ваттисен сăмахĕсене аса илчĕç, çăкăр çинчен асăннă илемлĕ произведенисене илсе кăтартрĕç. «Юмахсен тĕнчи» станцире «Йăвача» юмах тăрăх спектакль кăтартрĕç.

Çăкăра мĕн авалтанпах хисеплени, хаклă хăнасене халĕ те çăкăр-тăварпа кĕтсе илни пирки те сăмах пычĕ. Пирĕн вĕренекенсене халăхра анлă сарăлнă «Тырă выракан» ятлă пукане (унăн аллинче - пĕрремĕш кĕлте) мĕнле пуçланса кайни çинчен те каласа кăтартрĕç. Çăкăр хакĕ пирки сăмах пуçарсан, вулавăшра ĕçлекенсем Ленинград хупăрлавĕнчи питĕ хăрушă, выçлăхпа çыхăннă кунсене аса илчĕç.

Тĕлпулу вĕçленеспе викторина иртрĕ, тăваттăмĕшсем хăйсен пĕлĕвне тĕрĕслерĕç, çăкăрпа, ăна туса илессипе тата çак профессипе çыхăннă ыйтусем çине хуравларĕç.

Мероприятин тĕп тĕллевĕ ачасене çăкăра хисеплеме, унпа тирпейлĕ пулма вĕрентесси, çĕрĕçченĕсем унăн кашни татăкĕ сĕтел çине лектĕр тесе ырми-канми вăй хунине кăтартса парасси пулчĕ. Çăкăр - пурнăç тата ырлăх палли.

Тĕлпулу вĕçленеспе унта хутшăннисене пурне те тин пĕçернĕ, кăпăшка та тутлă шăршăллă çăкăрпа хăналарĕç. «Çăкăртан асли çук» ятпа кĕнекесен куравĕ те йĕркеленĕччĕ.

Çакнашкал мероприятисем ÿссе пыракан ăрăва ытти çынсен ĕçне хисеплеме, кашни кун курма хăнăхнă япаласен хакне туйма вĕрентеççĕ.

Т. МИХАЙЛОВА.