Мускавра «Раççей» наци центрĕнче «Хĕллехи тĕлĕнтермĕшсем» фестиваль пуçланнă. Хĕллехи асамçăсен Çĕнĕ çул умĕнхи парадне чи малтан Чăваш Республикинчен Хĕл Мучи пырса çитнĕ.

Вăл юрă-кĕвĕ нумай пĕлнипе, пур енĕпе те талантлă пулнипе палăрса тăрать, çавăн пекех авалхи музыка инструменчĕсем ăсталакан тата вĕсемпе илемлĕ калакан вырăс хĕлĕн юмахри тĕп сăнарĕсенчен пĕри шутланать.

Пирĕн Хĕл Мучи тĕлпулăва пынă ачасене асамлăха ĕненме чĕнсе каланă. «Хуть те мĕнле пулсан та, эсир тĕнчере тĕлĕнтермĕшсем пуррине ĕненме ан пăрахăр, вара пурнăç та çутăрах, илемлĕрех пулать. Тата пуринпе те ырă кăмăллă пулăр, çутçанталăка юратăр, хисеплĕр. Ун пек чухне вăл та сире ырăпа тавăрĕ, пулăшма тытăнĕ», - тенĕ Хĕл Мучи.

«Раççей» наци центрне çавăн пекех Бурят Республикинчен Сагаан Убкен ?Шурă Ватă ăсчах% та пырса çитнĕ. Вăл ачасене ыррине шанни, шиклĕхе çĕнтерме пĕлни хальхи пурнăçра питĕ кирли çинчен каласа кăтартнă.

«Пирĕн фестиваль - Çĕнĕ çул умĕнхи Раççейĕн чĕрĕ картти, хамăр çĕршыври тĕрлĕ регионсенче пурăнакан халăхсенче çÿрекен халапсен асамлă çипписен тĕвви. «Раççей» наци центрĕнче йăла-йĕркесем вăранаççĕ, эпир Çĕнĕ Çул умĕн чăннипех те тĕлĕнтермĕшсем пулса иртнине ачасем курччăр, ĕненччĕр, сайра тĕл пулакан историпе палăрса тăракан 19 илемлĕ, асамлă сăнар пуррине пĕлччĕр тетпĕр, - пĕлтернĕ «Раççей» наци центрĕн генеральнăй директорĕн заместителĕ Анастасия Звягина.

Программăра 18 тĕрлĕ спектакль, вĕсенчен кашнийĕнчех хĕллехи асамçăсен сăнарĕсемпе тĕплĕн паллаштарĕç. Мускава тĕрлĕ регионсенчи 19 Хĕл Мучи килсе çитнĕ ĕнтĕ.