Виçĕ çул каялла, 2023 çулхи ака уйăхĕн 4-мĕшĕнче, Куславкка районĕнчи Тĕрлемесри Культура çурчĕн ертÿçи Рушания Абдулхаева, ĕç ветеранĕсем Людмила Волковапа Нина Григорьева пархатарлă ĕç пуçарнă – ятарлă çар операцийĕн салтакĕсем валли хÿтĕлев каррисем (маскировка сеткисем) çыхма тытăннă. Ĕçе пуçласси кăна вĕт – тытăнсан каять.

Сетка çыхакансен шучĕ кунсерен хушăнсах пынă. Ун пек ырă ĕç туни пирки хыпар ял хушшинче хăвăрт сарăлать çав – хĕрарăмсем пĕрин хыççăн тепри çÿреме пуçланă Культура çуртне.

Паянхи куна хĕрарăмсен ушкăнĕ (вĕсем çирĕме яхăн) 220 сетка çыхнă. Волонтерсен хушшинче ытларах тивĕçлĕ канури ветерансем – вĕрентекенсем, воспитательсем тата ял хуçалăх ĕçченĕсем. Вĕсем хÿтĕлев карри çыхма ĕçе çÿренĕ пекех çÿреççĕ. Пысăк тăрăшулăхпа çыхнă маскировка сеткисем Тăван çĕршыв интересĕсене хÿтĕ-лекен салтаксене питĕ кирлĕ. Украинăри ятарлă çар операцине хутшăнакансем валли сетка хатĕрĕсене туянма май пур таран ял халăхĕ пулăшма тăрăшать. Пĕрисем салтаксем валли куллен кирлĕ япаласем туянса параççĕ, теприсем хатĕ-рленĕ гуманитари пулăшăвне СВО зонине çитерме тăрăшаççĕ.

Çапла майпа ăстасем Çĕнтерÿ кунне çывхартаççĕ, пĕрлĕхри тĕллеве пурнăçа кĕртессишĕн вăй-хала шеллемеççĕ, Тăван çĕршыва хÿтĕ-лекенсене пулăшаççĕ. «Пĕрлĕхре – вăй» тесе ахальтен каламаççĕ пуль çав.

Т. ВАСИЛЬЕВА.

В. КОНСТАНТИНОВ сăнÿкерчĕкĕ.