Чăваш Енре пĕр талăкра çеç 15 çĕрте пушар тухнине шута илнĕ. Çав шутра 6 тĕслĕхре типĕ курăк çуннă. Кун пирки мартăн 30-мĕшĕнче Раççей Чрезвычайлă лару-тăрусен министерствин пирĕн регион тăрăхĕнчи тĕп управленийĕ пĕлтернĕ.
Вут-çулăм ытларах сиен кÿнĕ тĕслĕхсене Вăрмар тата Куславкка муниципалитет округĕсенчи Хĕрлĕçырпа Ырашпулăх ялĕсем çывăхĕнче шута илнĕ. Вĕсенче пушар 2 гектара яхăн уя сиен кÿнĕ.
Ведомство сотрудникĕсем граждансене пушар хăрушсăрлăх правилисене çирĕп пăхăнма чĕнсе калаççĕ. Çавăн пекех аса илтереççĕ: типĕ курăка тата çÿп-çапа ан çунтарăр, пирус тĕпĕсене ăçта килчĕ унта ан пăрахăр, çурт-йĕр территорине çулăм хăвăрт хыпса илме пултаракан типĕ курăкран тата вут-шанкăран вăхăтра тасатăр.
Апрелĕн 1-мĕшĕнчен пуçласа Чăваш Енре пушара хирĕç кĕрешмелли ятарлă режим вăйра тăрать. Республика Ертÿçи Олег Николаев пушар хăрушсăрлăх правилисене çирĕп пăхăнма тата йĕркене пăснă тĕслĕхсем çинчен халăха пĕлтерсе тăма кирли çинчен тепĕр хут аса илтерет. Вăхăтра тивĕçлĕ мерăсем йышăннине пула пĕлтĕр пирĕн регионти вăрмансенче 13 пушар тухнине (2,08 гектар çинче) çеç шута илнĕ. Ку вăл Атăл тăрăхĕнчи федераллă округра чи пĕчĕк кăтартусенчен пĕри пулнă.
Апрелĕн 1-мĕшĕнчен пуçласа октябрĕн 30-мĕшĕччен Чăваш Енре вăрмансенчи пушарсене видеомониторинг меслечĕпе тупса палăртмалли система ĕçлет. Кунсăр пуçне «Пилотсăр авиаци системисем» наци проекчĕ пулăшнипе республикăна пушарсене тата вăрман законодательствине пăснă тĕслĕхсене шута илмелли 11 вĕçев аппарачĕ кÿрсе килмелле.
Олег Николаев республикăри муниципалитетсен тата хуласен округĕсен ертÿçисене вăрмансенчи пушарсене асăрхаттарас тĕлĕшпе тивĕçлĕ мерăсем йышăнма, пушар сÿнтерекенсене ятарлă техникăпа, оборудованипе тата кирлĕ хатĕрсемпе тивĕçтерме, пушартан сыхланмалли тăрăхсем (касăсем) туса тухма, çавăн пекех халăха пушар хăрушсăрлăх правилисем çинчен каласа ăнлантарма хушнă.
В. ИВАНОВ.
Апрель 2025 |