Апрелĕн 1-мĕшĕнчен пуçласа «Çемье ипотеки» программăпа килĕшÿллĕн çĕнĕ çуртсенче çеç мар, икĕ çурт ытла хута ярайман хуласенче те хваттер илме пулать.

Республикăри Строительство, архитектура тата ЖКХ министерстви пĕлтернĕ тăрăх, çакăн пек майпа хваттер туянма май пур хуласен списокне Раççей Федерацийĕнчи «Дом РФ» аталану институчĕ пичетленĕ. Унта апрелĕн 1-мĕшĕнчен пуçласа «Çемье ипотеки» программăпа килĕшÿллĕн иккĕмĕшле рынокра Чăваш Республикинчи 6 хулара – Улатăрта, Куславккара, Сĕнтĕ-рвăрринче, Çĕрпÿре, Çĕмĕрлере тата Етĕрнере – çулталăкне 6 процента çити ставкăпа хваттер туянма пулать.

«Программăри условисене анлăлатни республикăри нумай çемьене патшалăх пулăшăвĕпе тивĕçтерме май парать», – тет Чăваш Енри строительство, архитектура тата ЖКХ министрĕн тивĕçĕсене пурнăçлакан Владимир Максимов.

Программăра палăртнă условисем ансат: çăмăллăхлă ипотекăна Раççейре пурăнакан, улттă тултарман пĕр ача та пулин ÿстерекен граждансене параççĕ. Çитменнине тата хваттер сутакан туянаканшăн çывăх тăван та, юридици вăйĕнче тăракан та пулмалла мар, пачах ют çынран сутăн илмелле. Хваттер вырнаçнă çурт хăтлă тата йĕркеллĕ пулмалла, ăна хута янăранпа 20 çул ытла иртмелле мар.Çăмăллăхлă ипотекăпа пĕр хутчен кăна усă курма пулать.

Çак пуçарăва Раççей Федерацийĕн Президенчĕ Владимир Путин çемьесене пулăшас тĕллевпе сĕннĕ.