Кăçал пирĕн республика паллă куна – Чăваш автономине туса хунăранпа 105 çул çитнине уявлать. Регион Ертÿçи Олег Николаев йышăннипе чаплă уявпа çыхăннă мероприятисем Шупашкарта тата Етĕрне округĕнче иртеççĕ. Республика кунне уявламалли плана тĕрлĕ шайри 50 ытла мероприятие кĕртнĕ.

Уяв кунĕсенче социаллă пĕлтерĕшлĕ объектсем те уçăлмалла. Çав шутра: Шăхасанта поликлиника, Шупашкарти «Çĕнĕ хула» микрорайонта ачасен садикĕ, спортăн хĕллехи тĕсĕсен центрĕнче роллерлă йĕлтĕрсемпе ярăнмалли трасса, Улатăр, Патăръел, Вăрнар, Канаш, Комсомольски тата Муркаш округĕсенче фельдшерпа акушер пункчĕсем, çавăн пекех республикăн тĕп хулинче «Гранд Отель Мегаполис» хăна çурчĕ тата ытти объектсем те.