Çĕнĕ Шупашкарта пурăнакан 32-ри арçын ятарлă çар операцине хутшăнакан салтак карттин дубликатне туса унтан 2 миллион тенкĕ вăрланă. Унăн куншăн пĕтĕмĕшле режимлă колонире 3 çул çурă ларма тивĕ.

Суд палăртнă тăрăх, кăçал январьте вăл ятарлă çар операцине кайма контракт çырнă арçынпа паллашнă. Ăна ĕç укçи валли банк карттине тума пулăшнă. Çавăн чухне вăл хăйĕн валли дубликат туса ĕлкĕрнĕ. Салтак ятарлă çар операцине тухса кайсан банк картти çине унăн шалăвĕ килме тытăннă. Çак арçын дубликатпа усă курса унти 2 миллион ытла тенке илнĕ те хăй пĕлнĕ пек усă курнă. Чи малтанах парăмĕсене парса татнă.

Салтака кÿнĕ тăкака арçын саплаштарман-ха.